Ostiralean lortu zuen bikoak finalerako txartela, sailkatze estropadako bere txandan bigarren egin ondoren. Finala gaur goizean jokatu dute. Aurreko txapelketatan egin izan duten bezala, erdi aldean joan dira estropada zati handienean, eta proba amaitzeko 250 metroren faltan bosgarren martxa sartu diote motorrari. Aurkari batzuk aurreratu dituzte, eta hirugarren postuan iritsi dira helmugara, 3:21.80 denborarekin, urrea irabazi duten Carre eta Hubert frantziarrengandik segundo eta 12 ehunekora. Beccaro eta Burgo italiarrak izan dira bigarrenak.
Laugarren urtea da Peña Hungariako hiri honetan lehiatu dela, eta lau hitzordu horietan podiumera igo da. Pozik agertu da zumaiarra, "urte zail eta arraro honetan berriro ere podiumera igo" izanagatik. Orain opor txiki batzuk hartuko dituela adierazi du, denboraldi berrira, "urte olinpikora", indarberrituta prestatzeko.