Goikoetxea eta Manci, Goixerri eta Lekerikaren aurka neurtu ziren atzo gauean jokatutako Mutrikuko masterreko finalean. Partida berdindua izan eta aldeak ez ziren inoiz bizpahiru tantutik igo. Lehen seta Goixerri eta Lekerikaren alde erori zen (13-15); bigarrena, berriz, Goikoetxeak eta Mancik irabazi zuten (15-12).
Berdinketa hausteko set laburrean erabaki zen partida, eta, ondorioz, txapelketa. Goixerrik eta Lekerikak eskura izan zuten garaipena, 1-4 jarri baitziren aurretik. Huts egiteko aukerarik ez, eta Goikoetxeak eta Mancik lau tantu jarraian egin zituzten, seta 5-4 emaitzarekin irabazteko.
Asteburuko atsedenaldiaren ondoren, Goikoetxea eta Lekerika berriro neurtuko dira egun gutxi barru; Donibane Lohizuneko hirugarren masterreko finalean, hain zuzen ere. Goikoetxea Ibon Aldazabalekin arituko da, eta Lekerika Jon Tambourindeguyrekin.