Harralde garaile Egunean Behin jokoko Baleikeren taldean

Dagoeneko jaso du Harraldek Maiaur Izozkiak establezimenduak emandako gosari ederra.

Otsailaren 24tik martxoaren 1erako astean Harralde erabiltzailea izan da Egunean Behin jokoko Baleikeren taldean garaile. Hain zuzen ere, 540,61 puntu eskuratu ditu, bigarren postuan dagoenari hamar puntuko aldea aterata. Honenbestez, Harraldek eskuratu du astero Maiaur Izozkiak establezimenduak irabazlearentzat eskainitako gosari ederra.

Hemendik aurrera, denboraldi bakoitzeko jokalari onenak ere eskuratuko du saria. Zortzi asteko denboraldi labur honetan puntuazio altuena lortzen duenak Bai Bidea jatetxeak emandako bi lagunentzako otordua izango du opari. Zortzi astean denboraldiko sailkapena antolatzeko printzipio sinple bat aplikatu dugu: 8 astetik, 4 aste onenak zenbatuko zaizkio parte hartzaile bakoitzari.

Taldera batzeko jarraibideak
Egunak joan eta egunak etorri, gero eta erabiltzaile gehiago ditu Codesyntaxek garatutako Egunean Behin jokoak. Izenak dioen bezala, egunean behin partida bat jokatzeko aukera dute parte hartzaileek, eta euskaraz 10 galdera erantzun behar izaten dituzte horretarako. Zenbat eta gehiago asmatu, zenbat eta azkarrago asmatu, hobeto! Egunean Behin aplikazioa Google Play edo App Store plataformetatik deskargatu ondoren, 2B224C kodea erabili BALEIKE - Egunean Behin taldera batzeko.