Zumaiako Udalak astelehenean irekiko du epea herriko festetan kalean salmenta postuak jarri nahi dituzten eragile eta enpresek eskaera egin dezaten. Santelmoetan eta sanpedroetan Gernika parkean jartzen dira postuak, eta horretarako hainbat baldintza bete behar dira. Baldintza horiek argitaratu ditu udalak, eta hemen daude ikusgai.
Eskaera orria, berriz, hemendik jaitsi daiteke.
Udalak jakinarazi duenez, eskatzaile bakoitzak postu bakarra jarri ahalko du, eta gehienez hamabost postu egongo dira. Ohi bezala, eskaera orria bete eta udaletxean aurkeztu beharko da, eta horretarako epea otsailaren 6an amaituko da.
Erabakia zozketa bidez
Otsailaren 7an egingo du zozketa Zumaiako Udalak, eta horrela erabakiko da zeinek jarriko dituzten postuak festetan. Baimendutakoen zerrenda otsailaren 10ean argitaratuko du udalak, eta ondoren, baimendutako eskatzaile horiek otsailaren 26ra arteko epea izango dute (egun hori barne) baldintzak betetzen dituztela frogatzen duen dokumentazioa aurkezteko. Ordainagiria ere orduan aurkeztu beharko dute.