Igande honetan, urtarrilak 12, jokatuko da binakako txapelketa profesionaleko partida Aitzuri pilotalekuan, arratsaldeko 17:00etan. Olaizola II.a-Urrutikoetxea eta Bengoetxea VI.a-Mariezkurrena II.a bikoteek elkarren aurka jokatuko dute. Aurrez, Agirre-Eskiroz eta Arteaga II.a-Urretabizkaia bikoteen arteko lehia egongo da.
Sarrerak salgai daude sarean 25-30 eurotan (kudeaketa gastuak gehitu behar zaizkio prezioari) eta partidaren egunean ere Aitzuriko leihatilan eskuratzeko aukera egongo da, prezio berean (kudeaketa gasturik gabe).
Sarrerak zozkatuko dituzte
Bestalde, partidaren antolatzaileek udal ordezkariei eskainitako 15 sarrerak herritarren esku jartzea erabaki dute udal agintariek. Hori, zozketa bidez egingo dute. Herritarrek kiroldegian eman beharko dute izena parte hartzeko. Zozketa ostiralean egingo da, arratsaldeko 19:00etan, eta ordura arte parte hartzeko aukera dago.