Pasa den asteburuan hasi zen Gipuzkoako Bertsolari Txapelketa Oñatin eta Amasa-Villabonan jokatu ziren lehenengo bi final-zortzirenekin. Hala, asteburu honetan beste bi saio izango dira: larunbatean, Ordizian eta igandean, Zumaian.
Gurean jokatuko den saioan sei bertsolari hauek igoko dira Aita Mariko oholtzara:
- Ander Lizarralde Jimeno
- Beñat Jauregi Etxeberria
- Gorka Maiz Alustiza
- Iñigo Gorostarzu Etxebeste
- Jokin Bergara Eguren
- Unai Muñoa Amundarain
Aurkezle lanak Saroi Jauregi Aiestaranek egingo ditu eta epaimahaiko kideak hurrengoak izango dira: Eneritz Azkue Basurko, Karlos Ibarguren Olalde, Leire Beloki Lizarralde, Mikel Lersundi Ayestaran eta Mikel Urteaga Azkue. Idazkari lanetan, berriz, Silvia Etxaniz Alberdi ariko da.
Saioko irabazleak zuzenean sailkatuko da final-laurdenetara eta gainontzeko bertsolariek puntuazioaren arabera edukiko dute horretarako aukera. Hauek izango da bertsolariek egin beharko dituzten ariketak:
- Binaka, gaia emanda, zortziko handian hiruna bertso
- Binaka, gaia emanda, zortziko txikian hiruna bertso
- Bakarka, lehen puntua emanda, zortziko txikian bina bertso
- Binaka, gaia emanda, hamarreko txikian hiruna bertso
- Kartzela: bakarka, gaia emanda, nahi den doinu eta neurrian, hiruna bertso
Sarrerak dagoeneko salgai daude www.bertsosarrerak.eus atarian. Agortzen ez badira, zineko txarteldegian erosi ahal izango dira igandean bertan 16:00etatik aurrera.
Jon Maia, final-laurdenetan
Gipuzkoako Bertsolari Txapelketan izango da Jon Maia. Final-laurdenetan hasiko du txapelketa duela lau urteko finalera iritsi zelako. Eibarko Coliseo antzokian egingo du estreinaldia urriaren 26an, 17:00etan hasiko den saioan. Zumaiarrarekin batera seikotea osatuko dute ondoko hauek: Zumaiako saioko irabazleak; puntuazioz lehenengoak, bosgarrenak, hamargarrenak eta hamabosgarrenak.