Interes berezia zuen atzoko partidak Zumaiako zaletuentzat, herriko bi jokalari aritu zirelako aurrez aurre: Kauldi Odriozola Bidasoarekin, eta Ander Torriko Blendio Sinfinekin. Odriozolak hiru gol sartu zituen atzo, bi 9 metrotatik, eta beste bat kontraerasoan. Torrikok, Sinfineko goleatzaile handienetakoak, atzo ezin izan zuen golik sartu.
Kantabriarrak gogor atera ziren lehen zatian, eta lau goleko aldea izan zuten (7-11, 18. minutuan). Irundarrek atezaina aldatu zuten, eta hortik etorri zen Bidasoaren erreakzioa: lautik galtzen egotetik, markagailuan aurretik jartzera pasa ziren (14-13, 27. minutuan). Atsedenaldira 16-15 emaitzarekin heldu ziren. Edozer gauza gerta zitekeen oraindik.
Bigarren zatian defentsa indartu zuen Bidasoak, eta hori izan zen garaipenaren gakoa: atsedenalditik 45 minutura arteko ordu laurden horretan bost gol besterik ez zituen jaso. Amaieran, 32-27 emaitzarekin irabazi zion Bidasoak Blendio Sinfini.
Jardunaldia amaitzeko partida dezente geratzen dira, baina irundarrek ziurtatuta dute beste astebetez bigarren postuan jarraituko dutela.