Kimetz Etxabek zortzigarren amaitu du Munduko mushing txapelketa

Kimetz, eskuinean, Francisco Javier Alemannorekin

Gaur zen jokatzekoa Munduko mushing txapelketako hirugarren eta azken proba. Baina, gaur gauean izandako elurte bat dela medio, azken karrera hau bertan behera utzi dute. Ondorioz, lehen bi probetan izandako denborak hartu dituzte kontutan sailkapen orokorra osatzeko. 

Bessans herria zuriz jantzita esnatu da gaur. Elurte handi bat izan da gauean, eta egunerako aurreikusita zeuden hitzorduak bertan behera uztea erabaki dituzte Munduko mushing txapelketako antolatzaileek. Hala, distantzia luzeko probak bakarrik jokatu dituzte. Bertan behera geratu diren proban artean da Kimetz Etxabe zumaiarrak jokatu behar zuen hirugarren eta azken proba. 

Kimetzek sei txakurrek tiratako trineoko modalitatean hartu du parte. Gaurkoa jokatu gabe, asteazkenean eta ostegunean egindako postuekin eta denborekin osatu dute txapelketako sailkapen orokorra. Asteazkenean bederatzigarren izan zen, eta ostegunean seigarren. Denborak batuta, txapelketa zortzigarren postuan amaitu du Kimetzek. Irabazlea Renata Válková txekiarra izan da.