Ikuskizun honek izan ohi duen erantzuna ikusita eta herritarrentzat sarrerak lortzea errazteko, aurten lehen aldiz Internet bidezko salmenta ere bideratuko du Udalak.
Sarrerak, beraz, bi eratara erosteko aukera egongo da: saio bakoitzerako erdiak bertako salmentan jarriko dira, eta beste erdiak internetez. Bi salmentak egun berean hasiko badira ere, urtarrilaren 24an, zumaiarrei lehentasuna emateko helburuarekin, bertako salmenta 17:00etan hasiko da eta internet bidezkoa, aldiz, 19:00etan. Bertako salmenta Oxford aretoan egingo da eta Internet bidezkoa egiteko gunearen helbidea aurrerago iragarriko da. Interneteko sarrerak inprimatzea derrigorrezkoa izango da.
Sarrera guztiek prezio bera izango dute, 6 euro, eta pertsona bakoitzak gehienez 4 sarrera erosi ahal izango ditu.
Kultura sailak adierazi du lehen aldia izanik, salmenta guztia ondo joan ezkero martxoaren 4ean izango den Pirriotx, Porrotx eta Marimototsen Muxua ikuskizunerako salmenta ere era horretara egingo dela.