50 eta 70 metro karratuko 31 baratza dituen Baratze Parkea sortu du Zumaiako Udalak Kutxa Ekogunearen laguntzarekin. Izaera soziala ahalbidetzeko asmoz, horietatik erdia interes taldeentzat gordeko du Udalak. Hala nola, langabetuentzat, DSBE hartzaileentzat, ezgaituentzat, ama bakarreko bizikidetza unitateentzat… Gainerako lursailak herritarren artean zozketatuko dira, errentaren arabera.
Bihar egingo den bileran baratza horien funtzionamendua ezagutzeko aukera izango da, eta nola ez, lursailak eskuratzeko esleipen eta zozketa prozesuaren nondik-norakoak azalduko dira.
Baratze parkearen helburua da, nekazaritza jarduera lantzeaz haratago, ingurumena, ekologia, autokontsumoa edo elikadura osasuntsuaren inguruko heziketa eta sentsibilizazioa garatzea.
