Wikipediaren aplikazioa euskaraz

Wikipediaren aplikazioa euskaraz

Wikipediaren telefono mugikorreko aplikazioa itzultzen amaitu berri dugu Euskal Wikilarien Kultura Elkarteak eta Azkue Fundazioak. Bi erakundeon arteko akordioari esker, OpenStreetMap eta Wikipediako softwarea ere itzuli ditugu. 

Android zein iOS sistemarako eskuragarri dagoen tresna hau jaitsiz gero, hurrengo gaurkotzean euskaraz erabili ahal izango dute guztiz erabiltzaileek. Wikipediaren APPak aukera asko ematen ditu telefono mugikor bidez informazio guztira heltzeko.

Artikuluak hizkuntza ezberdinetan bilatzeko aukera ematen digu, gure hobespenen arabera, eta azken egunean gehien kontsultatu diren artikuluak eskaintzen dizkigu egunero. Gainera, egunero argazki bat ematen digu, Commonseko komunitateak kalitate handiko irudi gisa bozkatu dutena.

Android telefonoetarako eskuragarri dago eta iOS darabiltenetarako ere. Itzulpen lanekin jarraitzen dugu, eta datozen asteotan beste software batzuk ere euskaraz izango ditugu, guztiok ezagutza gure hizkuntzan eskuratu ahal izateko.