baleike.eus

Olatu handien Punta Galea Challenge proban hartuko du parte Imanol Yeregik

baleike 2017-10-11 12:56   Kirola

Olatu handien Punta Galea Challenge probaren XII. edizioa izango da aurtengoa, eta berrikuntza modura itxarote-epea hilabetez luzatu dute antolatzaileek; urriaren 15ean hasi eta martxoaren 31a arte. Getxon egingo den proba honetan, guztira, 24 surflari izango dira, eta bertan izango da Imanol Yeregi ere.

Olatu handien Punta Galea Challengeren XII. edizioa Big Wave Tour (BWT) munduko zirkuitutik kanpo egingo da aurten. Txapelketaren itxarote-epea igandean hasiko da, eta datorren urteko martxoaren 31a arte luzatuko da. "Luzapen honi esker, proba ospatzeko aukerak handitu egingo dira, izan ere, azken bi edizioak bertan behera gelditu ziren ez zirelako baldintza egokienak eman", adierazi dute antolatzaileek.

Guztira, 24 parte hartzaile izango dira, eta sei pertsonez osatutako lau mangetan banatuta lehiatuko dira lehendabizi, eta ondoren, finalaurrekoa eta finala jokatuko dira. Parte hartzaileetatik erdiak nazioarteko surflariak izango dira, eta beste erdia, aldiz, euskaldunak. Tartean izango da Imanol Yeregi zumaiarra, eta baita esaterako, Aritz Aranburu zarauztarra ere.

Urte bikaina burutzen ari da Yeregi. Iraila bukaeran Euskal Herriko Txapelketa irabazi zuen Sopelan, eta maiatzean Munduko Surf Txapelketan lehiatzeko aukera izan zuen Biarritzen.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa