Ohi bezala, azoka izango da goizean alde zaharrean, 10:00etatik aurrera. Baserriko gaiak erosteko aukera izango da, baina, baita ere, artisautzarekin lotutakoak ere aurkitu ahal izango dira. 30 bat postu izango dira, alde zaharreko kaleetan banatuta. Haurrentzako zenbait tailer ere izango dira, kandelena, saskiena eta euskal ikurrena. Azokarekin batera, goizean zehar, txalaparta, alboka eta trikitixa doinuak izango dira. Baita Inpernupeko joaldunak ere.
Eguerdian bertso saioak izango dira Unai Agirre eta Iker Zubeldiarekin. Lehen saioa, 12:00etan, Kofradiako balkoietan izango da; bigarrena, 12:30ean, udaletxeko balkoian.
14:30ean egingo da herri bazkaria Beheko Plazan jarritako karpan. Txartelak pasa den asteburuan jarri ziren salgai, turismo bulegoan, 8 euroan helduenak eta 4 euroan haurrenak (12 urte bitartekoak). Kultura Sailetik adierazi dutenez, gutxi batzuk geratzen dira salgai. Bazkarira joan nahi duzuenok, mugitu beharko zarete.
Arratsaldean, 19:00etatik aurrera, sagardo dastaketa egingo da Beheko Plazan. Hamar sagardo etxetako ardoak edateko aukera izango da. Aurretik, edalontzia erosi beharko da, hori bai.
Hemen duzue biharko egitarau osoa:
10:00 Baserriko gaien azoka
3 Taula txalapartarien saioa
10:30 Hala Gera taldearen alboka eta dultzaina doinuak
11:00 Inpernupeko Joaldunak
11:30 Zutrik taldearekin trikiti doinuak
12:00 Kofradian eta 12:30 Udaletxean balkoitik balkoirako bertso saioa: Unai Agirre eta Iker Zubeldia
14:30 Herri bazkaria
Bazkal ostean, euskal kantak Joxe Mendizabalekin
17:00-21:00 Amaiako plazan puzgarriak BMren eskutik
18:00 Beheko plazan Ttipika dantza gidatuak
Ordu berean Erkibe kultur elkartearen esku taloak
18:30 Amaiako plazan dantzaldia Joxe Mendizabalekin
19:00 Beti Jai Fanfarrearen kalejira
Ordu berean plazan, sagardo dastaketa
23:00 Kofradian, erromeria Ezten Giro taldearekin