baleike.eus

Gazteen emantzipazioa bultzatzeko ‘Alokairu beka’ ekimena proposatu du Udal Gobernuak

Baleike 2017-06-04 21:59   Gizartea

Udal Gobernuak 18-30 urte bitarteko gazte taldeek alokairurako laguntza eskaera bateratuta aurkeztu ahal izateko Alokairu beka izeneko ekimena proposatu du. Batez ere ikasleei zuzenduta dago eta helburua du alokairu partekatua sustatu eta herriko gazteei emantzipazio eta etxebizitza aukera berriak eskaintzea.

Bide horretatik, gazteek laguntza eskaera bateratua aurkeztu ahal izango dute eta eskari horiek indibidualek baino diru laguntza handiagoa jasoko dutela adierazi du Udalak. “Gaur egun, ikasle eta gazte askok, ordu gutxiko edo asteburuetako lanak izaten dituzte eta irabaziekin ezin dute bere kasa emantzipatu, ez baitira horrelako programek eskatu ohi dituzten diru-sarrera minimoetara iristen”, adierazi du gobernu taldeak.

Alokairu Bekaren bitartez, ordea, gazteen emantzipazioa erraztu eta alokairu partekatua sustatzeko apustuan, eskaera bateratua aurkeztuta, alokairuaren %65-75a ordaintzeko diru laguntza ematea planteatu du gobernuak. “Aztertu ditugun gainerako herrialdeetan, gehienez alokairuaren %50a ordaintzeko laguntzak eskaintzen dira, baina Zumaian, kostako herria izanik, alokairuak barnealdeko herrialdeetan baino garestiagoak dira, beraz, gazteen mesedetan, kopuru hori igotzea proposatu dugu”, gehitu du gobernu taldeak.

Ildo beretik, ekimen horrekin gazteen artean kontratu bidezko enplegua bultzatu nahi dutela adierazi dute gobernu kideek. “Zumaiako gazteei etxebizitza aukera berriak eskaini nahi dizkiegu eta horretarako ezinbestekoa da kontratu bidezko enplegua sustatzea, horiek ordu gutxikoak edo asteburuetakoak badira ere”, gehitu dute.

Datozen asteotan oinarri eta gainerako ezaugarri guztiak zehaztu eta ekimena uztaileko ohiko osoko bilkuran onartzea aurreikusi du gobernu taldeak. Behin prozedura hori itxita, behin-betiko programaren xehetasunak azalduko ditu.  

Erantzunak

Erabiltzailearen aurpegia EH Bildu Zumaia 2017-06-06 20:55 Erantzuna | #1

Gaztedia batzordean, maiatza erdialdera, emantzipazioan laguntzeko ordenantza proposamena aurkeztu zuten gure udal taldeko bi zinegotzik: Arritxu Iribarrek eta Nerea Eizagirrek.
Hurrengo batzordean, udal gobernuak hemen goian argitaratu den proposamena aurkeztu zuen, aurretik guk aurkeztuari inolako aipamenik egin gabe. Gaur da eguna oraindik ez dugula testu zehatza jaso, eta jaso nahi dugu, jasotzea dagokigula uste dugulako.
Hartara, gurea eta udal gobernuaren proposamena mahai gainean jarri, eta lan bateratua egiteko prest gaude, hasieratik adierazi dugun bezala Gaztedia batzordean. Elkarlanerako eta elkarrizketarako prest gaude, eta ea udal gobernuak bere proposamenaren berri idatziz ematen digun, lanketa bateratua egin ahal izateko.

.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa