Zumaiarekin lotura estua du Kepa Junkerak, umea zela hiru urtez hemen bizi izan zenetik. "Gero ere urte askotan etortzen ginen uda pasatzera, eta beti izan dut Zumaiari kantaren bat eskaintzeko gogo hori". Gaur Alondegian bideoklipa eta disko berriko lau kanta aurkeztu ditu, Sorginak taldeko kideekin batera. Disko berria ostegunean aurkeztuko du Bilbon. Zumaiakoa primizia izan da, beraz.
Harraldeko bizidunak aipatzen dira Marea Zumaian abestian, eta Zumaiako hainbat hitz erabiltzen dira gainera: txoaskina, maolillua, gomexa, oldija... Hemen irakur dezakezue Jon Maiak idatzitako letra:
Marea Zumaian
Harriz harri saltoka
itsasertzean
harriz harri saltoka
gu
Harri azpian glu glu
Dago andarika
Bere atzetik
korrika gu
Zoko batian gordea
Maolillua
Uraren kirikibildutan
Txikia ta iletsua
da txoaskiña
brankadetako zulotan
Algorri labarrean
ilgora ilbehera
marea gora eta
marea behera
Algorri labarretan
ilgora ilbehera
beti da desberdina
beti da bera
Iraileko mareetan
dator oldija
itsas belar osasuntsua
Zumaiako erregea
da olarrua
erroa galtzea ez du bere errua
Gomexa da putzutako
kamaleoia
orain urdin
Gero marroia
Harrapatzeko zailena
hor da ixkira
gauean begiek dizdira