Urdaibai, Bidasoa, Oria eta Urolaren itsasadarrak aztertu dituzte lan horretan. Urolaren ertzeko basadiei eta erriberei buruzko azalpenak emanak dizkigu lehen ere webgune honetan bertan. Zundaketa geoarkeologikoak ere egin zituzten, eta emaitzak analizatzen ari dira orain.
Artikuluaren laburpena:
Normalean urpean egoten diren gainazalak drainatuz sortutako lur berriei polder deitu ohi zaie. Euskaraz, erribera eta basadi hitzak ere ohikoak dira. Ikerketa-lan honetan, euskal kostako estuarioen bilakaera historikoan polderren eraikuntzak izan duen garrantzia aztertu da, Aro Berrian (XVI.-XIX. mendeen artean) bereziki. Horretarako, iturri dokumentalak, kartografia historikoa eta egungo lurzoruen egoera aztertu dira.
Lortutako emaitzek erakusten dutenez, polderren eraikuntzak garrantzia handia izan du estuario hauetako gizarteen bilakaera historikoan, Europako beste hainbat eskualdetan (Frantzian, Ingalaterran edota Herbehereetan) ezaguna den joerari jarraikiz. Prozesu honen ondorio sozialak, ekonomikoak eta ekologikoak handiak izan ziren, ezinbestekoak estuarioen egungo egoera ulertzeko. Gainera, eraldaketa horien aztarna materialak ugariak dira egungo paisaian: lubakiak, kanalizazioak, drainatze-zangak eta abar. Hortaz, esan daiteke euskal kostako estuarioek paisaia antropizatuak eratzen dituztela.
Osorik eskuratu nahi izanez gero, idatzi egileari: jnarbarte@aranzadi.eus
Osorik eskuratu nahi izanez gero, idatzi egileari: jnarbarte@aranzadi.eus