Egindako bidean zein aurrera begirakoan badute espazio berezitu bat komunikabideek, iritzi publikoa eraikitzeko garaian duten eragin nabarmenagatik. Urrunago joan gabe, prozesu horri eragiten dioten hautuak dira Barrionuevo elkarrizketatzeko eta GALen ekintzak gogoratzeko modu hori. Eta horiek zerikusi gutxi dute biktimen aitortzarekin eta, ondorioz, bake kazetaritza deritzonarekin.
Izan ere, existitzen da bake kazetaritza bat, gerra kazetaritza hegemonikoaren aurrean. Gatazkaren eraldaketara orientatutako kazetaritza litzateke, arazo estruktural eta kulturalei ere erreparatuko diena. Eta, noski, baita biktimen ahotsei leku bat eskaintzen diena ere, haien birbiktimizazioa sustatu gabe; aitortza, justizia eta erreparazioa lortzea xede dituena. Finean, kazetaritza arduratsu bat.