baleike.eus

Itzurun hondartzako eremua hobetzeko lanak egingo ditu Udalak

Erabiltzailearen aurpegia Zumaiako Udala 2018-05-14 18:34   Gizartea

Horien artean kantinako ertzetan itxitura mugikorrak jarri eta Itzurun Txiki eremuan alga pilaketen ondorioz sortutako usain txarrak saihesteko lanak egingo ditu. Horrez gain, Gipuzkoako Kostetako Zerbitzu Probintzialak hondartzako ezkerraldeko jaitsieran dauden harri solteak kendu eta eremua harri-jauziez babesteko egurrezko hesolez egindako egitura arin bat jarriko du.

Gero eta gutxiago geratzen da hondartza denboraldiari ongietorria emateko eta ordurako guztia prest izate aldera, Udalak hainbat hobekuntza lan egingo ditu Itzurun hondartza eremuan.

Esate baterako, bertako kantinako ertzetan itxitura mugikorrak jarriko ditu, bereziki galerna edo egun haizetsuetan bertan babestuago egon ahal izateko, haizea oztopo izan gabe.

Horrez gain, aurtengoan Itzurun Txiki eremuan (eskuin aldeko putzua) alga pilaketek eragindako usain txarren arazoari erantzuna emateko lanak egingo ditu Udalak. Izan ere, itsas goren eraginez,  hainbat alga eta ur pilatzen dira aipatu eremuan (pasarela goialdeko putzuan), eta mareak hilak direnean, ur eta alga horiek ez dira berritzen, hau da, ez dira bueltan itsasoratzen. Horri, gainera, uda sasoiko beroa gehitzen badiogu, bero horren eraginez, usteltze prozesu bat gertatzen da bertan. Ondorioz algek usain txarrak eragiten dituzte eta horrek, noski, herritarrek kexak ere pizten ditu.

Bide horretan, arazoari eta herritarren kexa zein eskaerei erantzuna emate aldera, aurten, pasarela azpian uraren joan-etorri naturala ahalbidetzeko lanak egingo ditu Udalak. Horrela, algekin batera ura ez da bertan pilatuko eta horri esker, hein handi batean, algen usteltze prozesua eta horrekin batera eremuko usain txarrak saihestuko dira.

Horrez gain, Gipuzkoako Kostetako Zerbitzu Probintzialak hondartzako ezkerraldeko jaitsieran dauden harri solteak kenduko ditu horiek eragindako irristada eta gainerako arriskuak ekiditeko. Horrez gain, etorkizunera begira bertako segurtasuna hobetu eta bermatzeko, eremua harri-jauziez babesteko egurrezko hesolez egindako egitura arin bat jarriko du.

Gaur bertan ekin die aipatu lanei eta gutxi gora behera hilabete iraungo dutela adierazi du, horrenbestez, hondartza denboraldia hasterako amaituta izango ditu.

Erantzunak

Argia 2018-05-15 12:00 Erantzuna | #1

Oso ondo iruditzen zait, bainan zer gertatu behar du aurten santixoko hondartzara joaten geranakin?
Ez dago eskubiderik hondartzarako garaia datorrenian obrak astia
Zuloagako bidetik ura goian dagoenian ezin da pasa eta zer? Danok txalupan? Zeinek ordainduta?
Hau ez da normala

tarrat 2018-05-23 10:36 Erantzuna | #2

"Horrez gain, aurtengoan Itzurun Txiki eremuan (eskuin aldeko putzua) alga pilaketek eragindako usain txarren arazoari erantzuna emateko lanak egingo ditu Udalak. Izan ere, itsas goren eraginez, hainbat alga eta ur pilatzen dira aipatu eremuan (pasarela goialdeko putzuan), eta mareak hilak direnean, ur eta alga horiek ez dira berritzen, hau da, ez dira bueltan itsasoratzen. Horri, gainera, uda sasoiko beroa gehitzen badiogu, bero horren eraginez, usteltze prozesu bat gertatzen da bertan. Ondorioz algek usain txarrak eragiten dituzte eta horrek, noski, herritarrek kexak ere pizten ditu."

Bada herritar temati horiek ez badute gogoko itsas usaina, doazela kiroldegiko igerilekura! Halako putzuak eta alga-pilaketak kosta osoan gertazen dira, berezkoak ditu kostak eta betidanik ezagutu ditugu. Orain zer? Ezjakinek erabaki behar dute nolakoa behar duen izan kosta?

Aitzaki polita bilatu du alkateak guztion dirua alferrik gastatzeko. Zer diot alferrik? Interes orokorraren kalterako gastatzea da hori!

tarrat 2018-05-23 10:38 Erantzuna | #3

Por zierto, nork egin du 'arazo' horren azterketa? Zer titulazio dauka? Ez da, kasualitatez, arkitektoa edo aparejadorea izango? Edo torneroa, saltzailea, nekazaria...? Zer jakintza du kostako ekologiaren gainean?

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa