baleike.eus

Udala egoera ekonomiko onean

Erabiltzailearen aurpegia Zumaiako Udala 2018-04-26 21:21   Ekonomia

Hain zuzen ere 5.513.635€ gerakina du une honetan Udalak, duela 3 urte baino 3.978.987€ gehiago. Egoera ekonomiko on, saneatu eta orekatu horrek herriarentzat eta herritarrentzat interesgarriak diren proiektuak aurrera eramateko aukera eskaintzen du

Gaur arratsaldean eginiko ohiko osoko bilkuran 2017ko aurrekontuaren likidazioa izan da gai nagusiena, 5.513.635€ko gerakinarekin itxi baitu Udalak aipatu urtea. Ildo horretan, udal gobernua pozik azaldu da, udal diru kutxak egoera osasuntsu eta onean daudelako.

2014ko aurrekontuen likidazioan Udalak zituen 1.534.648€tatik 5 milioi baino gehiago izatera pasa da hiru urteko epean. Une honetan, beraz, duela 3 urte baino 3.978.987€ gehiago ditu Udalak eta beraz, datuek berresten dute udal finantzen egoera on, saneatu eta orekatua. “Urtez urte zuhurtziaren printzipioari jarraituta aurrekontu errealista eta arrazoizkoak landu ditugu eta egindako udal baliabideen kudeaketa egoki eta eraginkorrak ahalbidetu du egun Udala egoera ekonomiko erosoan egotea” adierazi dute udal ordezkariek.

Horren harira gobernuko kideek gehitu dute, egungo egoera ekonomikoak herritarrentzat interesgarriak diren proiektuak gauzatzeko aukera ematen duela eta beraz, “Udala zorpetu gabe legealdi hasieran aurkeztutako proiektu eta ametsak eta emandako hitza betetzeko eta amets horiek egi bihurtzen jarraitzeko aukera izango dugu”.

Amaitzeko, gaurko Osoko Bilkuran, hirigintza arloan, Basadiko auzoko Ibaia taberna aurreko horman larrialdiko prozeduraz egiten ari diren egonkortze lanen berri eman da. Pertsonal alorrean, aldiz, iaz egin bezala, 2018ko udal lan eskaintza publikoan 3 udaltzainen postuak betetzeko hautaketa prozesua Polizia eta Larrialdietarako Euskal Akademiak bere gain hartzeko hitzarmena aurkeztu eta onartu da. Eta azkenik, Jon Iraola zinegotziak aurkeztutako liberazio partzialaren baliogabetzea onartu du udalbatzak. Horrekin batera, Bake Epaile berriaren eta horren ordezkoen izendapena ere onartu ditu.

Erantzunak

Erabiltzailearen aurpegia EH Bildu Zumaia 2018-04-27 15:32 Erantzuna | #1

Harrigarria iruditzen zaigu Udalak prentsara harro-harro ohar bat bidaltzea, esanez 2017ko likidazioaren ondoren 5,5 milioiko gerakina dagoela. Izan ere, (eta datu hau oso larria da), 2017rako EAJren udal gobernuak aurreikusitako inbertsioen %37 bakarrik gauzatu da! Horregatik dago gerakina, egin beharreko lanaren erdia ere ez duelako egin Udalak 2017an.

Legealdia aurrera doa, ia amaitzera, eta udal gobernuaren aldetik inakzioa sumatzen da, proiektuak geldirik daude, eta hori ez da harro egoteko zerbait. Kezkagarria da herriarentzat. Oier Korta alkateak 2015eko hauteskundeen bezperatan, Baleikeko eztabaidan, hau bota zuen, EH Bilduren lana egurtzeko: "Zer egongo da inauguratzeko Zumaian orain?". Berak zer inauguratu da, bada? Aitzuri frontoia, eta obra hau EH Bilduk aurreko legealdian aurrera eramandako egitasmoa izan zen.

Aurtengo aurrekontuen gaia plenoan aztergai izan zen egunean, iazko aurreikusitako inbertsioetatik asko ez zirela gauzatu azaldu zuenean Udal gobernuak, bertako kide baten azalpena ondorengoa izan zen: "Ez da erraza udaletxe bateko jarduna, eta gauzak ez dira beti nahi bezala ateratzen". Hortaz, aurreko legealdian "inakzioa zena EH Bilduren udal gobernuarena" (EAJk behin eta berriz esaten ziena zumaiarrei), orain "gauzak aurrera ateratzeko zailtasuna da".

Denbora omen epaile zorrotzena: bada, agerian geratu da EAJren estrategiaren parte izan zela EH Bilduri inakzioarena leporatzea aurreko legealdian, alkatetza nola edo hala, eta kosta ahala kosta berreskuratzeko.

Erabiltzailearen aurpegia Jon Urbieta 2018-05-07 09:39 Erantzuna | #2

Nik ez dakit aurrekontuen kontua nola doan, baina garbi dagoena da legealdi honetan gauza berriak egin baino, tokiak berritu edo konpondu behar izan direla, eta asko gainera!
Paola, Itzuruneko kantina, Ibaia taberna pareko azera, Galdona pareko kruzearean egokipena... Eta laster Santiago hondartzan egingo dutena. Badira gauzak!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa