baleike.eus

Zumaiako udal gobernuaren argibide oharra

Erabiltzailearen aurpegia Zumaiako Udala 2018-04-18 15:51   Gizartea

Atzoko egunez Txiribuelta elkarteak medio honetara igorritako eta argitaratutako informazioaren harira, Zumaiako udal gobernuak ondorengoa adierazi nahi du:

  • Lokal eskaeraren gaia ez da 2015ean hasitakoa, aurreko legealditik “zintzilik” dagoen gaia baizik.
  • Legealdi hau hasi zenetik, udal gobernu berriak hainbat bilera egin ditu Txiribueltako elkartekideekin, eta horietan beti azaldu du haien eskaerak entzun eta horiek aurrera eramateko borondatea.
  • Udal gobernu honek ez dio inoiz eskaerarik ukatu Txiribuelta elkarteari. Alderantziz. Udal gobernuak interesgarritzat eta egokitzat jotzen ditu elkartearen eskaera eta proposamenak, are gehiago 0-6 urte bitarteko haurren lokalarena, eta horregatik hain zuzen izan du beti, horri eta gainerako beste eskariei erantzuna ematearen aldeko jarrera.
  • Edonola ere, Txiribueltaren lokal eskaera horrek bere berezitasunak ditu, eta horiek aztertu eta lantzeko borondate osoa ere adierazi du  beti udal gobernuak.
  • Borondate horri helduta, esaterako, udal gobernu hau sarritan saiatu da Txiribueltako elkartearentzat lokal egoki baten kokagunea bilatzen.
  • Horri lotuta, elkarteko eskariei arintasunez erantzuna emate aldera, Torreberriko bigarren solairua (Gaztetxea) lokal hori jartzeko gune aproposenentzat jo zuen udal gobernuak. Gaia udal gobernuarekin aztertu eta eztabaidatu aurretik, ordea, bilera bat bera egin gabe, ideia eta kokagune hori baztertu zuten bi aldeek (Gaztetxea eta Txiribuelta elkartea).  
  • Zumaian, zorionez elkarte eta talde asko dago eta nahi izanda ere, Udalak ez ditu guztientzat adina lokal, ondorioz, hainbat elkartek lokalak partekatzen dituzte.   
  • Edonola ere, udal gobernuak gaineratu du Txiribueltak bere ekintzak aurrera eramateko azpiegitura beharrak izan dituenean, Udalak beti erantzun diola: Hogarra, Torreberri, Foronda, Branka, Alondegia, Haurreskola utzi izan dituela bere esku.
  • Espresuki biltegi gisa erabiltzeko lokal bat eskatzeko izan ezik (eskaera egin ahala ahalbidetu zitzaien lokal hori) azken urte eta erdi inguru honetan udal gobernuak ez du Txiribuelta elkartearen berririk izan, ez eta eskaerarik jaso. Ildo horretan gogorarazi nahi die, udaletxeko ateak uneoro zabalik daudela, inolako firma bilketa beharrik gabe, haien proposamenak eta eskaerak aurkeztu ditzaten, ondoren gaia aztertu eta landu ahal izateko.

Erantzunak

gadget 2018-04-19 04:35 Erantzuna | #1

Hiru urte (bai, hiru!) zoazte udalean eta halere kulpak aurrekoei bota nahian? Izan ere, zer egin duzue ba hiru urtean?
A bombo y platillo saldu dituzuenen artean:
-Eskola berria: aurreko legealditik lotuta.
-Frontoi berria: aurreko legealditik lotuta.
-Herri eskolako patioa estali: aurreko legealditik lotuta.
-Hondakinen bilketa sistema berria: hauteskunde kanpainan Oierrek berak nahi ez zuela zioen sistema bat ipintzen amaitu duzue (txipean eta kontrolean oinarrituta) eta komertzio eta enpresei atez atekoa.
-OTA aparkalekuak: lehenengo urtean txapuza egin eta poligonoa diskriminatu ondoren, hasieratik oposizioak eta herritarrek esaten zuten eredua ezartzen bukatu duzue.
-Axularko "bulebarizazioa": kanpainan agindu zenituzten aparkaleku plaza ERDIAK sortu dituzue, eta autobusek zain egon behar duten bi karril estu txapuzero (egunen batean istripuren bat gertatuko da).

Beraz, hiru urtean zein izan da talde honen lorpena? Tren txu txua? Aitzakia gutxiago, ia legealdia joan zaizue eta ez duzue ia ezer zuen kabuz egin eta.

Erabiltzailearen aurpegia Txiribuelta Elkartea 2018-04-19 12:19 Erantzuna | #2

"Gizakiaren bizitza zain egotea da. Zerbait inoiz gertatuko denaren esperoan izatea." Hala zioen Joan-Carles Mèlich filosofo eta irakasleak. Eta arrazoi puntua badu ere, Txiribueltako guraso eta umeook gertuago ditugun Pirritx, Porrotx eta Marimototsen mezua nahiago dugu: gauzak sentitu, gero horietaz pentsatu eta, amaitzeko, garrantzitsuena, ekin.

Horregatik, 0-6 ume eta gurasoentzako lokala Udal Gobernuaren oniritzia duela jakitun, eta urte batzuk zain izan ostean, sinadura bilketa abiatu dugu. Seguruena Udala beste gauza batzuekin oso lanpetuta izan da, eta kontu honi ez dio aparteko garrantzirik eman. Eta hain zuzen ere, horregatik ekin diogu sinadura bilketari, lokala ez dela kapritxoa, baizik eta herrian oso konpartitua den beharra dela erakusteko. Pozten gara Udalaren aldetik prestutasuna dagoela entzutea beste behin. Orain, Udalak, sentitu eta pentsatu ostean, gaiari ekitea besterik ez du falta. Inoiz ez da berandu.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa