baleike.eus

Entitate laguntzaileen sarea aurkeztu du Geoparkeak

Erabiltzailearen aurpegia Euskal Kostaldeko Geoparkea 2018-05-31 16:30   Gizartea

Topagune ireki eta parte-hartzailea izatea du helburu, Euskal Kostaldeko Geoparkearen bueltan.

Gaur goizean, hilak 31, Europako Geoparkeen Astearen baitan, ‘GeoparkeZaleak' ekimena aurkeztu da Itziarko Itxaspe Kanpinean. Euskal Kostaldeko Geoparkearen entitate laguntzaileak biltzen dituen komunitate dinamikoa eta irekia da. Gaur-gaurkoz Debako, Mutrikuko eta Zumaiako 19 entitate biltzen ditu sareak. Lurraldearekiko atxikimenduak eta ingurune sozial eta naturalarekiko konpromisoak batzen ditu, eta ekimenaren asmoa da Geoparkearen bueltan topagune irekia eta parte-hartzailea eratzea. Geoparkea zer den eta zer balio dituen zabaltzea izango du helburu nagusi.
 
Hasiera batean, sareak turismo arloko entitateak biltzen ditu, baina atxikimendu gehiago jaso eta hazten joatea da asmoa. Honela, pixkanaka sarera batu ahal izango dira Geoparkeko ikastetxeak, elkarteak, bestelako kolektiboak eta baita norbanakoak ere.
 
Gaurko aurkezpen ekitaldian izan dira Gipuzkoako Foru Aldundiko Turismo zuzendaria, Maite Cruzado, eta Debako, Mutrikuko eta Zumaiako alkateak. Udal ordezkariek bertaratu diren entitate laguntzaileak zoriondu eta esker ona adierazi diete, euren konpromiso eta ekimenagatik.
 
Ekimenarekin bat egin duten entitate gehienak Geoparkea osatzen duten hiru herrietako, Debako, Mutrikuko eta Zumaiako, ostatuak dira. Baina bada zerbitzu turistikoak eskaintzen dituen enpresa bat ere. Hauek guztiek egiaztatu dute kalitate eta etengabeko hobekuntza prozesuetan murgilduta daudela. Eskaintzen dituzten zerbitzuak eta produktuak ikuskatuak izan dira eta agerikoa da Euskal Kostaldeko UNESCOren Geoparkearekiko zein iraunkortasunarekiko duten konpromisoa.
 
Ekitaldian, sareko bi ordezkarik atxikimendu-adierazpena irakurri dute, entitate laguntzaileen konpromisoak jasotzen dituena. Jarraian, banan-banan, entitate laguntzaileek aurrerantzean euren establezimenduetan erakutsiko duten plaka bereizgarria jaso dute.
 
Geoparkeak, bestalde, geoparkea.eus webgunean laguntzaile diren entitateak soilik erakutsiko ditu. Gainera, deskontu kodeak banatuko dizkie entitate laguntzaileei, bezeroen artean Geoparkeko bisita gidatuetan parte hartzeko prezio murriztuak eskaini ditzaten.
 
Honekin guztiarekin, Geoparkeak aitortza egin nahi die kalitatearen eta iraunkortasunaren alde lanean diharduten eragileei.

*Entitate laguntzaileen zerrenda:
 
  1. Arbe Hotela (Mutriku)
  2. Arriola Txiki Nekazalturismoa (Deba)
  3. Begi Bistan zerbitzu turistikoak (Zumaia)
  4. Itxaspe Kanpina (Itziar, Deba)
  5. Saturraran Kanpina (Mutriku)
  6. Zumaia Kanpina (Zumaia)
  7. Eleizondo Landetxea (Lastur, Deba)
  8. Endañeta-Berri Nekazalturismoa (Zumaia)
  9. Errotaberri Landetxea (Itziar, Deba)
  10. Goikola Landetxea (Lastur, Deba)
  11. Kanala Hotela (tziar, Deba)
  12. Lasturko Aterpetxea (Lastur, Deba)
  13. Pikua Landetxea (Mutriku)
  14. Saka Nekazalturismoa (Deba)
  15. Santa Klara Nekazalturismoa (Zumaia)
  16. Talaso Zelai Hotela (Zumaia)
  17. Txindurri-Iturri Nekazalturismoa (Itziar, Deba)
  18. Zubeltzu-Torre Nekazalturismoa (Itziar, Deba)
  19. Zumalabe Hotela (Mutriku)
 

Erantzunak

Erabiltzailearen aurpegia enekodorronsoro 2018-06-01 12:18 Erantzuna | #1

Geologikoki aberatsa delako eman diote Geoparke izena gure kostaldeari.
Baina zein da helburua? Paisaia aberats mantentzea ala paisaiaren kontura aberastea?
Ur haunditan sartzera noa akaso, gaia urrunetik baino ez baitet jarraitzen.
Baina Geoparke baten lehen "lagunak" (eta oraingoz bakarrak) turismoarekiko interesa duten enpresak izatea... Alarma!
Lasaiago nengoke Geoparkearen lagunak herrietako natur taldeak balira. Ingurune horiek ustiatzen dituzten nekazariak. Haitzetan dabiltzan olarruzaleak.
Lehen pausuak haiekin adostasunean ematen badira, paisaia bizi bat ezagutuko du kanpotarrak.
Bestela... Ai! Ze postal polita!

Erabiltzailearen aurpegia Euskal Kostaldeko Geoparkea 2018-06-11 12:39 Erantzuna | #2

Mila esker ekarpenagatik, Eneko.
Lehendabiziko urratsak eman ditu ekimenak, eta pixkanaka eragile gehiagorengana heltzea izango da hurrengo pausoa, horien artean, aipatzen dituzun taldeak.
Kontuan izango dugu zure iritzia.
Ondo izan.

Erabiltzailearen aurpegia enekodorronsoro 2018-06-15 14:24 Erantzuna | #3

Eskerrik asko erantzuteagatik eta pozten naiz nere ekarpena baliagarri bazaizue.
Baina batez ere poztuko naiz aurrera begirako pausu horiek benetan eman eta aipatutako talde horiekin akordioetara iristen bazarete.
Zorte on!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa