Lurrean karearekin marra batzuk egin eta hanka baten gainean harri bat mugitzeko jolasari esaten diogu Zumaian “txintxarrika”. Oikian “letokoka” ere erabili izan dute. Oro har ezagunagoa da “txingoka”, eta beste izen asko ere baditu jolas honek: txingaka edo akiaketan (Getarian), altxerriñen eiñ (Aia), andandarrian (Deba), ankatxiñian (Errezil), tokoka (Beasainen eta Urretxun), famiaka (Elantxobe), iñtxuñtxur (Etxebarria), sankarranketan (Oñati), selemiñaka (Berriz), txingarreala (Jaurrieta), txiñtxargiñen (Azkoitia), txintxurriska (Bergara), txunetan (Pasaia), etab. Zerrenda handiagoa ikus daiteke Euskaltzaindiaren EHHA proiektuko mapa honetan.
Abelin Linazisorok Baleike aldizkarian Emili Ibarbiari 2006ko martxoan egindako elkarrizketan topatu dugu Zumaiako adibide hau:
- Neskak neskaekin soka-saltuan, lurrian kareakin edo harriakin raiak ein eta txintxarrika eta horrela. Eta mutilakin pelotan, baina apaizak ez zigun uzten alkarrekin jolasian ibiltzen eta hura azaltzen zanian, ospa. Mutilak martxa edo bestela neskak martxa.
Adora Osak ere ahotsak.eus guneko bideo batean kontatzen du txikitan askotan ibiltzen zirela txintxarrika.