Josu Ibarrek Bilbotik ekarritako lau metroko egurrezko ontzia da Mistika. Beduolak Axular ibiltokian duen lokalean ukitu batzuk eman eta margotu ondoren, gaur, arratsaldeko 6ak aldera itzuli da uretara. Denbora gutxian egon da, baina. Txalupa urtebete inguruan egon da ura ukitu gabe eta hori igarri da uretara itzultzerakoan, egur xaflen arteko zirrikituetatik ur dezente sartu delako. Arrapalara igo dute bueltan eta bertara lotu dute, itsas mareen bitartez ontzia ur-handitzeko.
Beduolak arrapalan dituen beste egurrezko bi ontzi ere uretan jarri ditu gaur arratsaldean, beltz kolorezko Ilunabar eta urdin kolorezko Magallanes. Bi ontzi hauek ere denbora batean egon dira ura ukitu gabe eta arraunean eraman dituzte moilaraino.