Bertso jaialdia egingo da Zumaian, abuztuaren 14ean. Beñat Lizaso, Nerea Ibarzabal, Eli Pagola eta Agin Larburu ariko dira bertsotan; gai-jartzailea Ane Ezenarro izango da. Saioa 19:30ean izango da, Herri Eskolako patioan (Sagarbiden). Eguraldi txarra egiten badu, Zumaiena ikastetxeko aretora eramango da. Gonbidapenak abuztuaren 13tik aurrera izango dira eskuragai turismo bulegoan. Pertsonako bi gonbidapen emango dira. Banatu gabe geratzen badira, egunean bertan emango dira atean.
Izotz ertzak du izena Keixeta artistak Alondegiko Oxford aretoan zabalduko duen erakusketak. Abuztuaren 14tik 30era bitartean egongo da. Ordutegia: egunero, 18:30etik 20:30era; asteburu eta jaiegunetan, 12:30etik 14:00etara eta 18:30etik 20:30era.
Santiago Segurak zuzendutako komediaren jarraipena da hau. Orain amaginarreba izango du bisitan. Pelikula bi asteburutan emango da, abuztuaren 14tik 17ra, eta hilaren 21etik 24ra. Ordutegia: ostiralean, larunbatean, igandean eta astelehenean 19:30ean.