Ikastetxeetako haurren festarekin hasiko dira datorren ostiral arratsaldean inauteriak herrian. Ondoren, 17:00etan Ludotekan jarraituko du festak, eta 18:30ean Musika Eskolak eta ZUMB Musika Bandak inauterietako kalejira eskainiko dute euskal inauteriak gaitzat hartuta.
Larunbatean, hilaren 25ean, egun guztian zehar egongo da inauterietako mundu majikoan sartzeko parada. Hala, 12:00etan The Joselontxos txarangaren kalejira izango da herriko kaleetan zehar. Arratsaldean, 17:00etan Eusebio Gurrutxaga plazan, inauteritako mozorro festa izango da, eta jarraian, The Joselontxos txarangak beste emanaldi bat emango du.
18:30etatik 21:00etara berriz, photocall-ean parte hartzeko aukera egongo da Oxford aretoan. Bertan egongo da kokatua Argazki Txokoa. Mozorro lehiaketak ere izango dira. Alde batetik, 18:00etan Eusebio Gurrutxaga plazan haurrentzako lehiaketa izango da. Bertan lau sari emango dira: banakoei eta taldeei bana, 0-8 urte eta 9-16 urte bitarteko adin tarteetan.
Bestetik, Gazte eta Helduen mozorro lehiaketa izango da. Kasu honetan ere lau sari emango dira:
- Larunbateko mozorro onenak: bikotea edo banakakoa 80 € / taldea 120 €
- Argazki Txokoan herritarren botazioko sariak: bikotea edo banakakoa 80 € / taldea 120 €
Egunarekin amaitzeko, 22:30etan hasita disko festa izango da Kofradian.
Inauterietako egitarauarekin jarraituz, igandean, zinea izango da Aita Marin 16:30ean.
Amaitzeko, astelehenean, Pirritx, Porrotx eta Marimotots pailazoen "Tipi-tapa, Korrika!” ikuskizuna izango da Maria eta Jose aretoan. Bi emanaldi izango dira: 15:00etan eta 17:30ean. 18:00etan aldiz, LH 4-6 bitarteko haurrentzat inauteri festa izango da Ludotekan.