Ostegun honetan Santelmopera bidean zegoen harrizko horma bat kendu izanak bultzatu ditu surflariak dei hau egitera. Game of Thrones telesaileko grabazio ekipoa pasatzeko kendu dute horma hori eta erabakiak mina eta haserrea eragin du herritar askoren artean.
Ostegunean bertan egin zuten Ziskeko surflariek dei hau eta erantzuna zabala izan da. Aurretik 'Itzurun errespetatu' zioen lema bat marraztu du hondarrean bertan. Haren atzean kokatu dira ekintzan parte hartu duten lagunak. Gazte eta heldu, eskuinekoak eta ezkerrekoak, anitza izan da bertaratutako jendea.
Justu aurretik Itzuruneko sarreran zegoen pankarta bat kendu dute udaltzainek eta ertzainek. 'Geoparkea, diru parkea' zioen pankarta horrek. Kentzen ari zirela, inguruan zegoen pertsona batzuk txaloka izan dira. Batek argazki bat atera du eta ertzain batek kamera arakatu dio.
