Oldi entsaladilla olagarro carpaccioarekin
Osagaiak sei lagunentzat
-200 g oldi berde (codium)
-1 kg patata
-1 tipula more
-2 azenario
-2 arrautza egosi
-500 g olagarro
-Saltsa: bi arrautza, ekilore olioa, baratxuri ale bat eta ozpina (zopa koilarakada bat).
Nola egin
Olagarroa egosi dagokion ur kopuruarekin. Olagarroa izoztu plastikozko ur botila huts batean sartuta.
Patata zurituak osorik egosi olagarroa egosteko erabilitako uretan. Arrautzak eta azenarioak ere egosi.
Patatak laukitxotan moztu, entsaladillarako bezala, arrautzak eta azenarioak berdin, eta oldiak (algak) fin-fin txikitu.
Saltsa egin, maionesa bat balitz bezala; ondo lodia gera dadin saiatu.
Osagai guztiak nahastu, saltsarekin ondo nahastuta geratzeko, olagarroa izan ezik, hura botilatik atera eta fin-fin moztuko dugulako xerratzeko makinan.
Molde batean sartu entsaladilla eta forma emanda aurkeztuko dugu, olagarro carpaccioa gainean jarrita eta gatz eskata eta oliba lio birjina estrarekin gozatuta.
Sukaldariaren gomendioak
Codiuma edo oldi berdea erraz aurki daiteke Zumaia inguruko harraldean. Ez gaude algak jaten ohituta, baina sorpresa ederra hartuko du batek baino gehiagok codiuma probatuta. Itsaso gustu bizia du, lanperna gogoratzen duena. Testura ere, esponja erakoa du. Gordinik jan daiteke entsaladetan; adibidez, perrixilaren ordez erabil daiteke, jakiak ontzeko. Olioei usaina emateko ere balio du. Egosita, beste barazkiekin bezala, kroketak, tortillak, pureak eta antzekoak egiteko. Bizpahiru minutuan egosten da, lurrunetan.
Bestalde, olagarroaren carpaccioa egiteko, olagarroa egosi eta izoztea gomendatzen du sukaldariak. Izoztuta askoz errazago moztuko ditugu xerra finan. Xerratzeko makinarik ez badaukagu, labanarekin. Xerra finak egin gabe ere, aurkez daiteke entsaladilla.
Saltsari dagokionez, izan daiteke maionesa edo gustuko besteren bat. Adibidez, ali-olia. Eta olagarroa erabili beharrean, bada, erabil daitezke muskuiluak eskabetxean, eta eskabetxea erabili maionesa egiteko. Azken finean, entsaladillak mila aukera eskaintzen ditu.
Olagarro erro kurruskaria
Osagaiak sei lagunentzat
-Sei olagarro erro
-50 g tenpura irin
-100 g panko (ogi birrindu japoniarra)
-Sei brotxeta
Nola egin
Errezeta hau egiteko lehen lana izango da olagarroa egostea, dagokion ur kopuruarekin eta gatzik gabe. Horretarako, ura irekiten jarri, eta momentu horretan olagarroa hiru bider galdarraztatu (sartu eta atera, azalik gal ez dezan) eta berehala egosten jarri 20-25 minutu inguruan (tamainaren arabera aldatzen da, eta onena da probatzea samur dagoela ikusi arte).
Itxaron hoztu arte eta erroaren zatirik ederrena moztu. Sartu brotxetan. Tenpura egin, irina dagokion ur kopuruarekin nahastuta. Ohikoa baino lodiagoa geratzea komeni da, olagarroaren errora hobeto itsasteko. Tenpuraren ondoren pankoarekin bildu, kroketa bat balitz bezala.
Olioa erruz jarri, eta bero-berotan frijitu behar da denak urre kolorea hartu arte.
Sukaldariaren gomendioak
Jakiak arrautza-irinetan pasatzeko beste modu bat baino ez da hemen proposatu dena, oso kurruskaria, hori bai. Beraz, olagarroarekin bezala, erabil daiteke beste hainbat jakirekin: langostinoak, barazkiak, arrain zatiak... Tenpura egiteko, irina ur oso hotzarekin nahastu behar da. Zenbat eta hotzago, orduan eta kontraste handiagoa olio beroan sartzean eta, ondorioz, kurruskariago. Errezeta honetan, sukaldariak gomendatzen du ohi baino tenpura lodiagoa egiteko, masak erroari ondo hel diezaion. Azkenik, lan hauek bezperan ez egiteko gomendatzen du; hobe momentuan edo frijitu baino pixka bat lehenago.
Pankoari dagokionez, Japoniako ogi birrindu moduko bat da. Asko erabiltzen da Asiako sukaldaritzan era askotako jakien gainean, batez ere itsaskiekin eta arrainekin, ahoan mokadu kurruskaria izateko.
Fabeak olagarroarekin eta lepapearekin
Osagaiak sei lagunentzat
-500 g fabadako fabe
-250 g txerri lepape fresko
-1 kilo olagarro
-1 tipula
-1 azenario
-1 porru
-3 baratxuri ale
Nola egin
Fabeak egosi urarekin, barazkiak osorik jarrita eta lepapea ere sartuta, gutxi gorabehera bi orduz, babarrun kopuruaren arabera. Hozten direnean, berezita jarriko ditugu alde batetik fabeak, bestetik lepapea, ondoan barazkiak eta azkena olagarroa.
Lepapea laukitxoetan moztu, olagarroa zati erregularretan, eta barazkiak xehatu olagarroa egosteko erabilitako ur pixka batekin.
Bukatzeko, jarri zartagin bat sutan, eta ondo bero dagoenean, bota lepape zatiak; gorritzen direnean jarri olagarroa, minutu batean salteatu, xehatutako barazkien saltsa gehitu eta fabeak ere bai.
Irakiten jarri eta nahikoa gazt duen ikusi. Koilararekin jateko moduan geratu behar dute.
Sukaldariaren gomendioak
Asturias aldeko babarrun berezi batzuk dira, adierazpen geografiko bidez babestuak. Jaime Llano sukaldariak dioenez, babarruna krematsu eta aldi berean osorik egon dadin, kare gutxiko urarekin egosi behar da. Kare kopurua murrizteko, egostean azenarioa erabiltzea gomendatzen du. Oso garrantzitsua, baita ere, koipedun jakiekin egostea, fabea behar bezala samurtu dadin. Eta azken gomendioa: fabea (edozein babarrun) beti likidoarekin estalita gorde, bestela azala ireki eta hautsi egiten da.
Kinoa, olagarroa eta atxiotea
Osagaiak sei lagunentzat
-Kiloko olagarroa
-Tipula more erdia, tomate heldu erdia, piper berde erdia
-2 baratxuri ale
-3 koilarakada oliba olio
-1 koilarakada Jerez
-500 g kinoa
-1 koskor atxiote pasta
Nola egin
Olagarroa egosi dagokion ur kopurua, aurrez hiru bide sartu-aterata (galdarraztatuta), azalik gal ez dezan. Prest egongo da gutxi gorabehera 45-50 minutu pasa ondoren. Zain egon hoztu arte eta zatitu. Geroko gorde.
Tipula, baratxuriak eta piperrak lauki txikitan moztu.
Su eztitan frijitu barazki txikituak oliba olioarekin, gehitu olagarroa, atxiote pasta, jereza eta olagarroa egosteko erabilitako ur pixka bat.
Kinoa garbitu ur zorrotada hotzarekin eta egosi olagarroaren saldarekin, ondo urrituta eta oso zaporetsu. Markaren arabera aldatu egiten da, baina kinoak 15-20 minutu behar ditu egiteko.
Kinoa prest dagoenean, bost minutuan pausatzen utzi, eta nahastu barazki, atxiote eta olagarro zati erregosiekin.
Sukaldariaren gomendioak
Indianoek Ameriketatik ekarritako pasta bat da atxiotea, hainbat espezie nahastuz egiten dena. Gorri kolore bizikoa da, eta izan daiteke mina edo gozoa. Atxiotearen ordez, adibidez, piper gorriaren haragia erabil daiteke.
Bestalde, kinoari buruz, esan behar da oso elikagai ona dela. Arroza bezala lantzen du askotan jendeak, baina sukaldatzean pasta bezala erabili behar da. Egosi baino lehen ondo garbitzeko gomendatzen du Llano sukaldariak, ur zorrotadaren azpian jarrita, bestela egostean loditu egingo da.