Itsasoarekin lotura estua duen herria izanik, arraun giroko izenburua jarri diote: Biharko Zumaiara boga. «Gure ustez, ezinbestekoa da hausnarketa egin eta herriari, denon artean, norabide bat ematea, eta denok batera helburu berari begira arraun egitea», azaldu zuen Jon Iraola zinegotziak aurkezpen ekitaldian. Plan honen berri herritarrei emateko, bilera bat egingo da ostegun honetan, 19:00etan, Alondegian.
Prozesu hau pasa den legegintzaldian jarri zen martxan eta 2015eko ekainera bitartean Zumaiako errealitatearen lehen argazkia osatu zen. Maiatzeko Udal Hauteskundeetan irabazi ondoren, EAJko gobernu taldeak proiektua berraztertu duela gaineratu zuen Iraolak. «Egindako lan horretatik abiatuta, diagnostiko hori herritarrekin, udaleko teknikariekin eta ordezkari politikoekin osatzea izango da lehenbiziko urratsa».
Lan hori aurtengo urte amaiera bitartean egiteko asmoa dago. Ondoren, 2016ko lehen sei hilabeteetan, diagnostiko horretatik abiatutako erronkan eta ekintzak proposatuko dira. Prozesua datorren urteko ekainerako bukatutzat emateko borondatea erakutsi dute udal ordezkariek. «Plan Estrategiko hau hurrengo Hirigintza Plana lantzeko oinarria izatea nahi dugu», komentatu zuen Jon Iraolak.
Herritarren partaidetza
Etorkizuneko eszenatoki hori herritarrekin pentsatu eta diseinatzeari garrantzia eman nahi dio Udalak. «Horregatik, prozesuan herritarrak inplikatu nahi ditugu, beraien iritziak, ekarpenak eta ideiak jaso eta denon artean etorkizuneko Zumaia irudikatu eta eraikitzeko», adierazi zuen Gotzon Embil zinegotziak.
Zumaiarrek duten erantzukizuna gogoratu nahian, herritar guztien artean zozketa egin da eta ausaz 96 lagun hautatuak izan dira prozesuan parte hartzeko, «herritarren artean parte hartzeko kultura sustatuz», azpimarratu du Embilek. Bizilagun horiekin batera, alor edo esparru bakoitzeko eragile eta pertsona adituak ere gonbidatuko dituzte lan saioetara.
Hala ere, saioak irekiak izango dira bestelako herritarrentzako; hori bai, pertsona kopurua kudeatzeko helburuarekin izena emateko epea zabaldu da. Prozesuan parte hartu nahi dutenek aldez aurretik izena emango dute 943363040 (luzapena 509) telefonora deituta edo helbide honetara idatzita: i.aldekoa@elhuyar.com.
Plan Estrategiko hau gauzatzeko lehen fasean, abendura bitartean, herritar, aditu eta eragileek gaur egun Zumaia nola ikusten duten zehaztuko dutela esplikatu du Idoia Aldekoak, Elhuyar Aholkularitzako teknikariak.
Gogoeta errazteko, lau lan-arlotan banatuko da eztabaida: lurralde antolamendua (hirigintza, etxebizitzak, obra publikoak...); garapen sozioekonomikoa (turismoa, enplegua, ekonomia...); zerbitzu eta ekipamenduak; eta elkarbizitza eta herrigintza (aniztasuna, berdintasuna, euskara...). Arlo bakoitzeko bi orduko saio bana egitekoak badira ere, arlo jakin batzuetan, garapen ekonomikoaren eta lurralde antolamenduaren kasuan, adituekin eta herritarrekin saio bana egingo da.
zazpi bilera
Lurralde antolamendua (adituak). Urriak 21, 19:00-21:00. Arranpla gelan.
Garapen ekonomikoa (adituak). Urriak 28, 19:00-21:00. Arranpla gelan.
Garapen ekonomikoa (herritarrak). Azaroak 2, 19:00-21:00. Oxforden.
Zerbitzuak eta ekipamenduak (herritarrak+adituak). Azaroak 4, 19:00-21:00. Hogarrean.
Herrigintza eta elkarbizitza (herritarrak+adituak). Azaroak 9, 19:00-21:00. Hogarrean.
Lurralde-antolamendua (herritarrak). Azaroak 11, 19:00-21:00. Brankan.