2009 urtean hasitako bideari jarraitu eta bide horretan sakondu nahi du Zumaiako Udalak. Urte horretatik, arlo ezberdinetan parekidetasuna lantzen ari da herri parekidea osatzeko helburuarekin. 2009ko azaroan ekin zitzaion, lehen aldiz, berdintasun diagnosia egiteari. Diagnosi hartako datuetatik abiatuta osatu zen 2010etik gaur arte indarrean den I. Berdintasun Plana. Baina lehengo plan hura berritu, eta herriaren beharretara eta jendartea egokitzeko ordua iritsi dela erabaki du Udalak.II. Berdintasun plana osatzeko lanean hasiko da Udala, baina argi du, planak herriarena behar duela izan."Herritarrek ez badute bere sentitzen ez du eraginik izango", esan du Berdintasun zinegotzi Maitane Agirrek. Plana osatzeko prozesua, apirilean hasiko da, eta lehen zeregina orain arteko planaren ebaluaketa egin, eta ondorioak ateratzea izango da. Planaren edukiak lantzeaz gain, egiturak berraztertu eta indartzeko asmoa ere badu Udalak. Ondoren, bigarren planeko helburuak eta bitartekoak zeintzuk izango diren zehaztuko da.
Osatzen den plan berri horrek, 2015-2018 epealdian bete beharreko plangintza, lan ildoak eta helburuak zehaztuko ditu.
Zortzi bilera
Prozesuan, zortzi bilera egingo dira, horietako lau herritar orori irekiak. Bi zati izango ditu prozesuak, lehen zatian aurreko planaren ebaluazioa egingo da, eta bigarren zatian hurrengo plana diseinatzeari ekingo zaio.
Lehen zati horretako bileretan orain arte egindako ibilbidearen inguruan hausnartzea eta eztabaidatzea izango da helburua. Horretarako bi ordu inguruko bilerak izango dira. Bilera horietan dinamika ezberdinak egingo dira. Herritarrekin eta eragileekin lehen bilera, apirilaren 1ean, 18:30ean, Alondegian izango da.
Eragile eta herritarrek bilera horietan parte hartzeaz gain, Berdintasun planaren eta sailaren inguruko iritzia emateko beste aukera edo modu bat ere jarri nahi du Udalak. Horretarako inkesta bat prestatu du. Eragileei prozesuan parte hartzeko gonbidapenarekin batera, zuzenean bidaliko zaie bete beharreko inkesta. Inkesta horien bidez, informazio gehiago jaso nahi du Udalak. Inkesta horiek norbanakoek ere bete ahalko dituzte horretarako postontziak jarriko dira Alondegian, udaletxean eta kiroldegian. Herritar eta eragileen iritziez gain, Udaleko ordezkari politikoekin eta teknikoekin bilerak egingo dira.