Aurten ere Zumaiako Udalak ‘Egin euskaraz errenta aitorpena’ kanpaina jarri du martxan. Horrekin batera, Udaleko Euskara Zerbitzua errentaren aitorpena egiten duten aholkularitza zerbitzuekin harremanetan jarri da eta guztiek bat egin dute kanpainarekin; mahai gaineko txartel batzuen bidez adieraziko dute euskaraz egiteko aukera, eta kartelak ere jarriko dira hainbat lekutan herritarrak horretara gonbidatzeko.
Kanpainaren helburua da hastear den errentaren aitorpenaren kanpainan zumaiar gehiagok egitea aitorpena euskaraz. Errentaren gaineko aitorpena egiteko kanpaina apirilaren 16an hasi eta ekainaren 25ean amaituko da; etxera bidalitako autolikidazio proposamenak apirilaren 10etik aurrera berretsi ahal izango dira.
Hiru bide daude aitorpena egiteko eta guztietan erabil daiteke euskara:
Autolikidazio proposamena
Zergadun batzuei etxera bidaliko dizuete proposamena, Foru Ogasunak eskura daukan informazioan oinarritutakoa. Proposamena ontzat ematen baduzu, bi bide daude onartzeko: telefonoz edota Internet bidez.
Egin euskaraz: proposamena eta eskutitza ele bietan jasoko dituzu. Telefonoa erabiliz gero, euskara erabiltzeko aukera emango dizute. lnternet bidez ere euskaraz egiteko aukera izango duzu.
Mekanizatua
Foru Ogasuneko bulegoetan egiten da; gure eskualdean Azpeitian egin dezakegu. Horretarako hitzordua eskatu behar da, telefonoz edo lnternetez.
Egin euskaraz: telefonoak euskara aukeratzeko bidea emango dizu, baita lnterneteko atariak ere. Bulegoan euskaraz hitz egiten baduzu, langileak euskaraz beteko du zure aitorpena; hala ere, ziur egoteko, adieraz iezaiozu aitorpena euskaraz egiteko borondatea.
Internet bidezkoa
Batetik, aholkularitza zerbitzuek erabiltzen dute bide hau. Gune horietara gure sarreren, gastuen, kenkarien eta abarren frogagiriak eraman eta bertako langileak arduratzen dira aitorpena egin eta bidaltzeaz.
Egin euskaraz: ondoko zerrendan daude Zumaian non egin ahal izango duzun zure aitorpena euskaraz. Nahikoa duzu bertako langileari euskaraz egin nahi duzula adieraztea.
AM aholkulariak. Ardantzabidea 16, behea. 943 862609
Ricardo Azcue aholkularitza. Txomin Agirre kaia 4. 943 862651
Unanue aholkulariak. Erribera kalea 6. 943860960.
Zumai aholkularitza. Amaiako plaza 15. 943862624.
Bestetik, partikularrek ere har dezakete bide hau aurten, ogasunaren webgunean. Horretarako Zergabidea laguntza programa erabili behar da
Egin euskaraz: Interneteko gunean hasieratik euskaraz betetzeko aukera izango duzu, eta PDFko inprimakiak euskaraz ere badauzkazu eskura.
Aurreko urteetako datu batzuk
Zumaiako datuak |
2009an |
2010ean |
2011n |
2012an |
Aitorpena egin zuten herritarrak |
5.058 |
5.091 |
5.059 |
5.056 |
Foru Ogasunarekin harremanak euskaraz izan daitezela eskatu zutenak |
758 (%14,98) |
802 (%15,75) |
830 (%16,40) |
920 (%18,19) |